ಈಶಾನ್ಯ ಭಾರತದ ಸೌಂದರ್ಯವನ್ನು ಕಣ್ತುಂಬಿಕೊಳ್ಳುವ ಆಸೆ ನಿಮಗಿದೆಯೇ? ಹಚ್ಚ ಹಸಿರಿನ ಚಹಾ ತೋಟಗಳು, ಬ್ರಹ್ಮಪುತ್ರಾ ನದಿಯ ವೈಭವ, ಅಪರೂಪದ ವನ್ಯಜೀವಿಗಳು, ಪುರಾತನ ದೇವಾಲಯಗಳು ಹಾಗೂ ವಿಶಿಷ್ಟ ಸಂಸ್ಕೃತಿಯ ಅನುಭವ ಪಡೆಯಲು ಅಸ್ಸಾಂ ಅತ್ಯುತ್ತಮ ಪ್ರವಾಸಿ ತಾಣ. ಇಂತಹ ಸುಂದರ ರಾಜ್ಯವನ್ನು ಸುತ್ತಾಡಲು ಅಡಿಗಾಸ್‌ ಯಾತ್ರಾ 6 ದಿನಗಳ ವಿಶೇಷ ಪ್ರವಾಸಿ ಪ್ಯಾಕೇಜ್ ಪರಿಚಯಿಸಿದೆ. ಕಾಜಿರಂಗ ರಾಷ್ಟ್ರೀಯ ಉದ್ಯಾನವನ, ಮಜುಲಿ ನದಿ ದ್ವೀಪ, ಜೋರ್ಹತ್ ಮತ್ತು ಗುವಾಹಟಿಯ ಪ್ರಮುಖ ಪ್ರವಾಸಿ ತಾಣಗಳನ್ನು ಒಳಗೊಂಡಿರುವ ಈ ಪ್ರವಾಸ ಪ್ರಕೃತಿ, ಸಾಹಸ ಮತ್ತು ಸಂಸ್ಕೃತಿಯ ಅದ್ಭುತ ಸಂಗಮವಾಗಿದೆ.
ಕಾಜಿರಂಗ ರಾಷ್ಟ್ರೀಯ ಉದ್ಯಾನವನ: ವನ್ಯಜೀವಿಗಳ ಅದ್ಭುತ ಲೋಕ!
ಅಸ್ಸಾಂ ಪ್ರವಾಸ ಆರಂಭವಾಗುವುದೇ ಗುವಾಹಟಿ ವಿಮಾನ ನಿಲ್ದಾಣ ಅಥವಾ ರೈಲು ನಿಲ್ದಾಣದಿಂದ. ಅಲ್ಲಿಂದ ಸುಮಾರು 220 ಕಿ.ಮೀ ಪ್ರಯಾಣಿಸಿ ಕಾಜಿರಂಗ ರಾಷ್ಟ್ರೀಯ ಉದ್ಯಾನವನ ತಲುಪಬಹುದು. ಯುನೆಸ್ಕೋ ವಿಶ್ವ ಪರಂಪರೆಯ ತಾಣವಾಗಿರುವ ಕಾಜಿರಂಗವು ವಿಶ್ವದಲ್ಲೇ ಅತಿ ಹೆಚ್ಚು ಒಂದು ಕೊಂಬಿನ ಘೇಂಡಾಮೃಗಗಳಿಗೆ ನೆಲೆಯಾಗಿದೆ.
ಇಲ್ಲಿ ಆನೆ ಸಫಾರಿ ಮತ್ತು ಜೀಪ್‌ ಸಫಾರಿ ಮೂಲಕ ವನ್ಯಜೀವಿಗಳ ಅದ್ಭುತ ಲೋಕವನ್ನು ಹತ್ತಿರದಿಂದ ವೀಕ್ಷಿಸಬಹುದು. ಘೇಂಡಾಮೃಗಗಳು, ಕಾಡೆಮ್ಮೆಗಳು, ಜಿಂಕೆಗಳು, ಆನೆಗಳು ಸೇರಿದಂತೆ ಹಲವು ಪ್ರಾಣಿಗಳನ್ನು ಕಾಣಬಹುದು. ಅದೃಷ್ಟವಿದ್ದರೆ ಹುಲಿಯ ದರ್ಶನವೂ ಆಗಬಹುದು. ಉದ್ಯಾನದ ಜಲಮೂಲಗಳ ಬಳಿ ಪೆಲಿಕಾನ್‌, ಕೊಕ್ಕರೆ ಸೇರಿದಂತೆ ಹಲವು ಬಗೆಯ ಪಕ್ಷಿಗಳನ್ನು ವೀಕ್ಷಿಸುವ ಅವಕಾಶವಿದೆ. ಕಾಜಿರಂಗದ ಸುತ್ತಮುತ್ತಲಿನ ಹಚ್ಚ ಹಸಿರಿನ ಚಹಾ ತೋಟಗಳ ಸೌಂದರ್ಯವೂ ಪ್ರವಾಸಿಗರ ಮನಸೆಳೆಯುತ್ತದೆ.
ಮಜುಲಿ: ಬ್ರಹ್ಮಪುತ್ರಾ ನದಿಯ ಮಡಿಲಲ್ಲಿರುವ ಸುಂದರ ದ್ವೀಪ!
ಕಾಜಿರಂಗದಿಂದ ನಿಮತಿಘಾಟ್‌ಗೆ ತೆರಳಿ, ಅಲ್ಲಿಂದ ಬ್ರಹ್ಮಪುತ್ರಾ ನದಿಯಲ್ಲಿ ದೋಣಿ ಪ್ರಯಾಣದ ಮೂಲಕ ಮಜುಲಿ ದ್ವೀಪವನ್ನು ತಲುಪಬಹುದು. ಜನವಸತಿಯಿರುವ ವಿಶ್ವದ ಅತಿದೊಡ್ಡ ನದಿ ದ್ವೀಪಗಳಲ್ಲಿ ಒಂದಾಗಿರುವ ಮಜುಲಿ, ಅಸ್ಸಾಂನ ವಿಶಿಷ್ಟ ವೈಷ್ಣವ ಸಂಸ್ಕೃತಿ ಮತ್ತು ಪರಂಪರೆಯ ತವರೂರು.
ಇಲ್ಲಿನ ಸತ್ರಗಳು ಅಂದರೆ ವೈಷ್ಣವ ಮಠಗಳು ಧಾರ್ಮಿಕ ಮತ್ತು ಸಾಂಸ್ಕೃತಿಕ ಮಹತ್ವ ಹೊಂದಿವೆ. ಮಜುಲಿಯ ಕುಂಬಾರಿಕೆ ಗ್ರಾಮ ಹಾಗೂ ಮುಖವಾಡ ತಯಾರಿಕಾ ಗ್ರಾಮಗಳು ಪ್ರವಾಸದ ಪ್ರಮುಖ ಆಕರ್ಷಣೆಗಳು. ಮಣ್ಣು, ಬಿದಿರು ಮತ್ತು ಬಟ್ಟೆಗಳನ್ನು ಬಳಸಿ ತಯಾರಿಸುವ ಬೃಹತ್‌ ಮುಖವಾಡಗಳು ಇಲ್ಲಿನ ವಿಶಿಷ್ಟ ಕರಕುಶಲ ಕಲೆಗೆ ಸಾಕ್ಷಿಯಾಗಿವೆ. ರಾಮಾಯಣ, ಮಹಾಭಾರತ ಮತ್ತು ಪುರಾಣಗಳ ಪಾತ್ರಗಳನ್ನು ಪ್ರತಿಬಿಂಬಿಸುವ ಈ ಮುಖವಾಡಗಳು ಪ್ರವಾಸಿಗರಿಗೆ ವಿಶೇಷ ಅನುಭವ ನೀಡುತ್ತವೆ.
ಜೋರ್ಹತ್: ಚಹಾ ತೋಟಗಳ ಸುಂದರ ತಾಣ!
ಮಜುಲಿಯಿಂದ ಮತ್ತೆ ಬ್ರಹ್ಮಪುತ್ರಾ ನದಿಯಲ್ಲಿ ದೋಣಿ ಪ್ರಯಾಣದ ಮೂಲಕ ನಿಮತಿಘಾಟ್‌ಗೆ ಮರಳಬಹುದು. ಅಲ್ಲಿಂದ ಜೋರ್ಹತ್‌ಗೆ ತೆರಳಬಹುದು. ಚಹಾ ತೋಟಗಳು ಮತ್ತು ಅಸ್ಸಾಂನ ವಿಶಿಷ್ಟ ಗ್ರಾಮೀಣ ಪರಿಸರಕ್ಕೆ ಹೆಸರುವಾಸಿಯಾಗಿರುವ ಜೋರ್ಹತ್ ಪ್ರವಾಸಿಗರಿಗೆ ಶಾಂತವಾದ ಅನುಭವ ನೀಡುತ್ತದೆ. ಇಲ್ಲಿನ ಹಸಿರು ಪರಿಸರ ಮತ್ತು ನಿಸರ್ಗದ ಸೊಬಗು ಪ್ರವಾಸದ ನೆನಪುಗಳನ್ನು ಮತ್ತಷ್ಟು ಸುಂದರಗೊಳಿಸುತ್ತದೆ.
ಗುವಾಹಟಿ: ದೇವಾಲಯಗಳು ಮತ್ತು ಬ್ರಹ್ಮಪುತ್ರಾ ನದಿಯ ವೈಭವ!
ಅಸ್ಸಾಂನ ಪ್ರಮುಖ ನಗರವಾದ ಗುವಾಹಟಿ ಪ್ರವಾಸದ ಮತ್ತೊಂದು ಆಕರ್ಷಣೆ. ಇಲ್ಲಿನ ನೀಲಾಚಲ ಬೆಟ್ಟದ ಮೇಲಿರುವ ಪ್ರಸಿದ್ಧ ಕಾಮಾಕ್ಯ ದೇವಾಲಯ ಪ್ರಮುಖ ಶಕ್ತಿಪೀಠಗಳಲ್ಲಿ ಒಂದಾಗಿದೆ. ಇದರೊಂದಿಗೆ ಬ್ರಹ್ಮಪುತ್ರಾ ನದಿಯ ಮಧ್ಯದಲ್ಲಿರುವ ಉಮಾನಂದ ದೇವಾಲಯ ಮತ್ತು ನವಗ್ರಹ ದೇವಾಲಯಗಳಿಗೂ ಭೇಟಿ ನೀಡಬಹುದು.
ಸಂಜೆಯ ವೇಳೆ ಬ್ರಹ್ಮಪುತ್ರಾ ನದಿಯಲ್ಲಿ ಕ್ರೂಸ್‌ ವಿಹಾರ ಕೈಗೊಂಡು ಸೂರ್ಯಾಸ್ತದ ಸುಂದರ ದೃಶ್ಯವನ್ನು ಕಣ್ತುಂಬಿಕೊಳ್ಳಬಹುದು. ನದಿ, ಬೆಟ್ಟ, ದೇವಾಲಯ ಮತ್ತು ಪ್ರಕೃತಿಯ ಸೊಬಗನ್ನು ಒಂದೇ ಪ್ರವಾಸದಲ್ಲಿ ಅನುಭವಿಸುವ ಅವಕಾಶ ಈ ಪ್ಯಾಕೇಜ್‌ನ ವಿಶೇಷತೆಯಾಗಿದೆ.
ಅಡಿಗಾಸ್‌ ಯಾತ್ರಾದಲ್ಲಿ ನಿಮ್ಮ ಆಯ್ಕೆಯ ಪ್ರವಾಸ ಪ್ಯಾಕೇಜ್!
ಅಸ್ಸಾಂ ಪ್ರವಾಸ ಕೈಗೊಳ್ಳಲು ಇಚ್ಛಿಸುವವರಿಗಾಗಿ ಅಡಿಗಾಸ್‌ ಯಾತ್ರಾ ಸ್ಟ್ಯಾಂಡರ್ಡ್‌, ಡಿಲಕ್ಸ್‌ ಮತ್ತು ಲಕ್ಸುರಿ ವಿಭಾಗಗಳಲ್ಲಿ ಪ್ಯಾಕೇಜ್‌ಗಳನ್ನು ಒದಗಿಸುತ್ತಿದೆ. ಪ್ರವಾಸಿಗರು ತಮ್ಮ ಅನುಕೂಲಕ್ಕೆ ತಕ್ಕಂತೆ ಹಾಗೂ ತಮ್ಮ ಆಯ್ಕೆಯ ದಿನದಂದು ಪ್ರವಾಸವನ್ನು ಯೋಜಿಸಿಕೊಳ್ಳಬಹುದು.
ಈ ಕುರಿತು ಮಾಹಿತಿ ನೀಡಿರುವ ಸಂಸ್ಥೆಯ ಸಂಸ್ಥಾಪಕ ಕೆ. ನಾಗರಾಜ ಅಡಿಗ ಅವರು, ಅಸ್ಸಾಂ ಪ್ರವಾಸದ ಬುಕಿಂಗ್‌ ಆರಂಭವಾಗಿದ್ದು, ಆಸಕ್ತರು ಹೆಚ್ಚಿನ ಮಾಹಿತಿ ಮತ್ತು ಬುಕ್ಕಿಂಗ್‌ಗಾಗಿ ಹುಬ್ಬಳ್ಳಿ ಹಾಗೂ ಬೆಂಗಳೂರಿನ ಬಸವನಗುಡಿ, ಮಲ್ಲೇಶ್ವರಂ, ವಿಜಯನಗರ ಮತ್ತು ರಾಜರಾಜೇಶ್ವರಿ ನಗರದ ಕಚೇರಿಗಳನ್ನು ಸಂಪರ್ಕಿಸಬಹುದು. ದೂರವಾಣಿ ಮೂಲಕವೂ ಮಾಹಿತಿ ಪಡೆದುಕೊಳ್ಳಬಹುದು ಎಂದು ತಿಳಿಸಿದ್ದಾರೆ.
ವನ್ಯಜೀವಿಗಳ ರೋಮಾಂಚನ, ಬ್ರಹ್ಮಪುತ್ರಾ ನದಿಯ ವಿಹಾರ, ಮಜುಲಿಯ ಸಾಂಸ್ಕೃತಿಕ ವೈಭವ ಮತ್ತು ಗುವಾಹಟಿಯ ಆಧ್ಯಾತ್ಮಿಕ ತಾಣಗಳನ್ನು ಒಂದೇ ಪ್ರವಾಸದಲ್ಲಿ ಅನುಭವಿಸಲು ಅಡಿಗಾಸ್‌ ಯಾತ್ರಾದ ಈ 6 ದಿನಗಳ ಅಸ್ಸಾಂ ಪ್ರವಾಸ ಉತ್ತಮ ಅವಕಾಶವಾಗಿದೆ.